إحساس باسم
مشرف
عدد الرسائل : 151
العمر : 32
المزاج : حزينة
تاريخ التسجيل : 03/04/2009
 |  موضوع: قصيدة:يحسين أول ماحبينه وأول ما شفناك للشاعر: عبدالخالق المحنه  الأربعاء أبريل 08, 2009 3:31 pm | |
| يحسين أول ماحبينه وأول ما شفناك
سدّينه الباب وما نقبل نعشگ ثاني اوياك
عهد وايظل ولا نقبل نعشگ ثاني اوياك
ماطاب جرح امصيبتك - عاشر اگلوب احبابك
بينه انته تجري اويه الدمه - وانحوم فوگ اترابك
اتغيب واتعود الشمس - يالماعرفنه اغيابك
معروف لو جار الزمن - بجروحنه ندگ بابك
كل يوم انشاهد هالحاله من يگصد محتاج
يرجع والبسمه اعلى اشفافه يرجع لابس تاج
لگينه الحل ولا نقبل نعشگ ثاني اوياك
يحسين سر امحبتك - فيها البشر محتاره
وإلينبض ابدمّه العشگ - يتعمّد اعلى اخطاره
مايمنع الوادي وجبل - طول البحر عبّاره
بس انته لوزاد الخطر - يكثر عدد زوّاره
تتزاحم عالموت احــــبابـــــــك تتعنّه الأخطار
وإليوصل أول يتشرف يرفع كلمة ثــــــار
يموت أوّل ولا يقبل يعشگ ثاني اوياك
موعجبه لو وسط البحر - موكب عزاك انشوفه
والموج يشعر بالألم - من يلطم اعلى اجروفه
اسمك نعرفه ابكل لغه - محّد يغيّر احروفه
ماعدنه سر ويختفي - وأفكارنه المعروفه
كل موكب يتصدّر فكره وكل منبر دستور
لتظن بقعه ابهذا العالم ماتعرف عاشور
يجي ويرحل ولا نقبل نعشگ ثاني اوياك
نتفنّن ابنوع الألم - كلمن اوعنده اسلوبه
كل ضربه تطبع بالصدر - لوحة حذر مكتوبه
واللي يشاهد بالعزه - أم الحسن مصيوبه
اشعندك اتلومه بعد - لمن يمزگ ثوبه
شفنه إلمامر اعلى الدنيه شفنه اشكال اشكال
من قامت واحنه ابهالحـــاله مايتغير حال
فلا ننذل ولا نقبل نعشگ ثاني اوياك
نتميز ولون الحزن - ماتختلف ألوانه
واتشوف دمعه ابكل جفن - لازم نعيش احزانه
وإلچان ماعنده وإجو - زوّارك إلصيوانه
توصل يبيع اشما ملك - بس مايسد بيبانه
وإلباع إلعنده وما عنده ويتبسّم للجاي
هذا اينومه وهذا ايوكله وهذا ايشربه الماي
إلك نسأل ولانقبل نعشگ ثاني اوياك
نحچي اعلى عاشورك سنه - والمده ما محدوده
نختم وأبد مانعترف كل واحد ومجهوده
كلمن يروح إلمهنته - ابيوم الأجر موعوده
زوّار والناعي وخدم - والشاعر ورادوده
تتساوى الناس ابعاشورك واحد كلها اتصير
نفس الحرقه ونفس الدمعه ومايحدث تغيير
فلا تنمّل ولا تقبل نعشگ ثاني اوياك
مرّات ياخدنه الزمن - بمصايبه وحسباته
لكن إذا هل الشهر - لازم ترف راياته
نسكت سنه وگالوا مضت - فتره ونسوا ثاراته
مينام بركان الغضب - لتأمِّن ابسكتاته
صح الأقدار اتفرگنه وكلمن راده ايريد
لكن نتجمّع بالشدة ونلزم إيد بإيد
نصير أجمل ولا نقبل نعشگ ثاني اوياك
| |
|
ابن النجف
مدير المنتدى
عدد الرسائل : 825
العمر : 39
الموقع : العراق
تاريخ التسجيل : 01/10/2008
| |
إحساس باسم
مشرف
عدد الرسائل : 151
العمر : 32
المزاج : حزينة
تاريخ التسجيل : 03/04/2009
| | موضوع: رد: قصيدة:يحسين أول ماحبينه وأول ما شفناك للشاعر: عبدالخالق المحنه الخميس أبريل 09, 2009 2:46 pm | |
| منوووور أخي ابن النجف
تحيااتي لشخصكــ
إحساس باسم | |
|
