القصيدة في مدح عدي بن حاتم الطائي رضي الله عنه صاحب امير المؤمنين الامام علي عليه السلام وهي من " الرجز المربوع " الذي يتكون من اربعة اجزاء " مستفعلن مستفعلن مستفعلن مستفعلن " يدخل القطع – وهو اسقاط ساكن الوتد المجموع وتسكين ما قبله – على التفعيلتين الثانيه والرابعة " مستفعلن " فتصير " مستفعل" وهي ما يعادل " مفعولن " فيصبح وزنها بعد ذلك " مستفعلن مفعولن مستفعلن مفعولن " ويسمى لدى شعراء العامه " شياله " وهو من الاوزان النسائية والمنبرية الابتكار انتشر في السنين الاولى من القرن العشرين للميلاد .
"31- شياله "
حاتم بحر احسانه وابنه الأصيل ايمثله
واهل المثل گالوها كل فرع يتبع أصله
***
بحر المكارم حاتم وهذا بحر البحر ما ينضب
جود وفضل يتطافح للمثل أصبح مضرب
ابجوده انرسم تاريخه وظل يزهي مثل الكوكب
وابعصره حاتم أصبح أكرم رجاله الملّه
****
ديوان يعرب رشَّح أكرم رجال العالم
لنها النتايج ظهرت محَّد يضارع حاتم
هذا كريم اتعيَّن أكرم سلاله آدم
بسّ الرسل واليمّه گدرت تضاهي فضله
****
عن فضله لاون تسأل دونك جواب الوافد
نبع الكرم من حاتم وابنه عدي الرافد
صح المثل واتطبق سرّ الولد عالوالد
وثاني مثل يعرضلك كل خير يندل اهله
***
كل منهل عدي ابسلساله يحمل صفات المنبع
ومنهل عدي الطائي لصافي المنابع يرجع
يحمل سلامه فطره ايمازجها طيب المرضع
عنصر شيم واجدامه ما تگرب لكل زله
****
ابسيرة عدي الطائي روح الشيم تتجسد
وبعنفوان اسنينه عانق رساله احمد
ذاته الشريفه الحره لأشرف نهج تتودد
وبالعز شمس إيمانه تتوضح وتتجله
****
بايع رسول الأمه وتابع شريعه دينه
وعن واجبات المبدأ ما لحظه غمضت عينه
حبل الوصل ظل ممتد بين الرسول وبينه
وراعي الوفه لغاياته طيب السجيه ايوصله
****
طابع وفه ابشخصيته وحفظ العهد من شانه
ساعة نزول الشده ما ينحرف وجدانه
عگب الرسول الهادي ابحيدر ثبت ايمانه
زاصبح يلازم حيدر مثل العمود وظله
****
شارك علي ابكل شده ويتشابچ اويه الكلفه
ابنار الشدد ما يهتم وصف الذهب من وصفه
كلما يحيطه اللاهب أكثر بعد يتصفه
ونيرانه كلما زادت معباره يصبح أغله
****
ويه الوصي ابميدانه خاض وبده استعداده
سجل صحف تضحيته واتخلدت أمجاده
ضحه بأعز ما عنده قدم جميع اولاده
صفين أجل كل شاهد هاي الحرب تشهد له
****
هاي الحرب رسمتله درب الشهاده الهادف
وثلث فلذ من چبده طُرفَه وطُريف وطارف
لجل الوصي ضحاهم وگباله دمهم نازف
بسم الإله استرجع وگلبه ابصبر يتحلّه
****
ابفگد البنين اعيونه حبست مسيل الدمعه
ابرفع المصاحف لمن بلغت مداها الخدعه
بالهدنه لازم حيدر ومثل الخيال ايتبعه
وايگله لو اتگطع عنك فلا اتخله
****
ويوم الذي ابمحرابه حيدر تنازف دمه
مهجة عدي الطائي حرگتها نار الصدمه
شبه الثواكل ينحب ويجري المدامع يمه
صب المزن لمصابه ايصب الدمع وايهلّه
*****
مدنف يعيش اسنينه ابحسرة هضم يتحسّر
من عمره كل عام ايمر ايجدّد مصيبة حيدر
لامر وسن بعيونه او لا عيشه بيها استثمر
طبع الخليل ايساهر لمّن يفارگ خلّه
****
وانقل الك هالصوره معنى المراجل تعكس
لمّن ابن هند ارسل وادخل عدي بالمجلس
طاغي ، وعدي من شافه فوگ العرش متنومس
استهون مقامه وأصبح ابنظرة هوان ايصدله
****
والد يزيد الفاجر ابچلمة المغرِض ناده
يالطائي چنت لحيدر ابسوح الحرب تتفاده
وياك ابد ما أنصف لسّا تعيش اولاده
واولادك انته الماتوا وضحوا عمرهم لجله
****
اسمع عدي الطائي اشجاوب خصيمه اورده
اتگول الوصي ما أنصف شنهو الشفت من عنده
آنه اللي ما أنصفته مات وعشت من بعده
ياريت حيدر عايش وآنه اللي ميِّت گبله
****
حيدر يعيش ابدمي يا هذا افهم واسمع
هالدنيه وحشه وظلمه عگب البطين الانزع
لا تعتقد من بعده هالدنيه تسوه وتنفع
عگب الحبيب الدنيه ابعين المحب ما تحله
***
يا هذا اسمع مني اولا تنسه هاي الچلمه
يوم القيامه الباري شمل الخليقه ايلمه
وكل خصم يوم المحشر يوگف يحاسب خصمه
وانته اويه حيدر توگف شتجاوبه وشتگله
****
اخذ الحذر يا هذا ابعرش الحكم لا تغتر
هالدنيه لابد تگضي ومن واجباتك تحذر
باچر تطول الوگفه ويه الوصي بالمحشر
ورب الجلاله لعبده عن كل خفيه ايسئله
****
" لندن -1999م"